अब प्रदेश सरकारले करार ऐन पास गरेर कर्मचारी पूर्ति गर्छ : मुख्यमन्त्री राउत

राजनीति

       

जनकपुरधाम, ६ कार्तिक । प्रदेश प्रहरी ऐनप्रति केन्द्रको असन्तुष्टि रहेको बेला प्रदेश २ का मुख्यमन्त्री मो. लालबाबु राउत गद्दीले कर्मचारीको अभावका आफूहरुले काम नसकिरहेको भन्दै अब करार ऐन पास गरेर कर्मचारी पूर्ति गर्ने बताएका छन् ।

मंगलबार नेकपाको प्रदेश २ को कार्यालय उद्घाटन तथा शुभकामना आदानप्रदान कार्यक्रममा सम्बोधन गर्दै मुख्यमन्त्री राउतले नेकपाका केन्द्रीय अध्यक्षलगायत केन्द्रीय मन्त्रीहरुको अगाडि यस्तो कुरा बताएका हुन् ।

उनले आफूहरुले संविधानलाई नै टेकेर प्रहरी ऐन ल्याएको दाबी गर्दै अब आवश्यक परे करार कर्मचारी ऐन पनि पारित गरेर कर्मचारी पूर्ति गर्ने जिकिर गरे ।

उनले सिंहदरबार गाउँ–गाउँमा भनिए पनि अहिले पनि केन्द्रकै कब्जामा सिंहदरबार रहेको आरोप लगाए । उनले केन्द्रले आफूलाई दिनुपर्ने अधिकार अहिलेसम्म पनि दिन नचाहेको बताए ।

‘केन्द्रले एक वर्षभित्र संघीय प्रहरी ऐन पास गरिसक्नुपर्ने थियो तर, ढिलाई भएकोले प्रदेशले आफ्नो प्रदेश प्रहरी ऐन ल्याएको हो’ मुख्मयन्त्रीले भने, ‘हामीले संविधानको अक्षरशः पालना गरेका छौं ।’

तपाईको प्रतिक्रिया