सेवा प्रवाहको झन्झटिलो प्रक्रियाले भ्रष्टाचारलाई संस्थागत गर्यो : मुख्यमन्त्री राउत

राजनीति

       

जनकपुरधाम, ३१ बैशाख । मुख्यमन्त्री लालबाबु राउतले सेवा प्रवाहको झन्झटिलो प्रक्रियाले भ्रष्टाचार संस्थागत हुँदै गएको टिप्पणी गरेका छन् । उच्चस्तरीय प्रशासन सुधार कार्यान्वयन तथा अनुगमन समितिको आयोजनामा जनकपुरमा सम्पन्न प्रशासकीय न्याय, साकारात्मक सोच र सेवा विषयक अन्तरक्रिया कार्यक्रमलाई सम्बोधन गर्दै मुख्यमन्त्री राउतले यस्तो टिप्पणी गरेका हुन् ।

उनले सेवाग्राहीहरु झन्झटिलो प्रक्रियालाई थेग्न नसकेपछि घुस दिएर काम गराउने गरेको भएकाले सेवा प्रवाहको प्रक्रियालाई जनमुखी र व्यवहारिक बनाउनु पर्ने बताए ।

मुख्यमन्त्री राउतले भ्रष्टाचारको अन्त्यको शुरुवात माथिबाटै हुनुपर्ने उल्लेख गर्दै भने ‘भ्रष्टाचार अन्त्यको शुरुवात आफै बाट गरिनुपर्दछ , त्यो पनि माथिल्लो निकायबाट । अनि मात्र भ्रष्टाचार नियन्त्रण गर्न सकिन्छ ।’
नियम र कानून बनाएर भ्रष्टाचार अन्त्य गर्न नसकिने दावी गर्दै उनले यसका लागि आफ्नै छातीमा हात राखेर अघि बढनुपर्ने उल्लेख गरे ।

नियम कानुन मिचेर गरिएको कर्मचारी समायोजनले प्रदेश र स्थानीय तहमा आएको कर्मचारीहरुमा आतंक सृजना गर्ने कार्य गरेको उनको दाबी छ ।

जनकपुर उच्च अदालतका मुख्यन्यायधिश हरि पोखरेलको अध्यक्षतामा भएको उक्त अन्तरक्रिया कार्यक्रममा मधेशी आयोगका अध्यक्ष डा. विजय दत्त, उच्च स्तरीय प्रशासन सुधार कार्यान्वयन तथा अनुगमन समितिका अध्यक्ष काशिराज दहाल, प्रदेश सभा सदस्य, प्रमुख जिल्ला अधिकारी प्रदिप कनेल सहितले सम्बोधन गरेका थिए ।

तपाईको प्रतिक्रिया