सिंहदरबार गाउँमा त छ तर केही अप्ठ्याराहरू पनि छन् : शिव नारायण साह

मेयर, डाक्नेश्वरी नगरपालिका, सप्तरी

स्थानीय सम्वाद्

    २०७६ साल कार्तिक १५ गते शुक्रबार   

सप्तरी जिल्लाको मध्य दक्षिण भाग तथा पूर्व पश्चिम राजमार्गको दक्षिण भागमा पर्ने यस नगरपालिका वि.सं. २०७३ सालमा पातो बजारमा केन्द्र राखी १० वटा गा.वि.स.हरू मिलेर नगरपालिकाको स्थापना गरिएको हो । पातो अवस्थित शक्तिपीठ डाक्नी माताका नामले यसको नामाकरण गरिएको छ । साविक १० गा.वि.स. हाल १० वडा, कविलासा, हरिराहा, तरही, भुतही, पातो, औरही, ब्रहमपुर, गम्हरिया प्रवाहा, पत्थरगाडा र बनौला वडामा विभाजन गरिएको हो । यस नगरपालिका कुल क्षेत्रफल ६९.११ वर्ग कि.मी. ४४,७८२ जनसंख्या रहेको छ ।

० तपाइँ मेयर भएदेखि अहिलेसम्म के–के काम भयो ?

— नेपाल अहिले नयाँ संरचनामा छ । तीन तहको सरकार छ । करिब दुई दशकदेखि जनप्रतिनिधिविहीनताको अवस्थामा जब हामी निर्वाचित भएर आयौं, जनताका धेरै अपेक्षाहरू देखिए । हामीले जनताका हरेक आवश्यकतालाई मध्यनजर गर्दै विकास निर्माणका कामहरू गरिरहेका छौं । मुख्यरूपमा हामीले शिक्षा, स्वास्थ्य, बाटोघाटोको अवस्था सुधारमा केन्द्रित भएका छौं । यो नगरपालिकामा अहिले ६ वटा बर्थिङ्ग सेन्टर सञ्चालन भएको छ । सबै वार्डहरूमा स्वास्थ्यचौकीको स्थापना गरेका छौं । यस नगरपालिकामा स्वास्थ्य क्षेत्रमा उल्लेखनीय काम भएको छ । त्यस्तै, शिक्षामा पनि सुधार आएको छ । शिक्षातर्फ केन्द्र सरकारको उदारता नै देखिएको छ । विकास निर्माणका कामहरू पनि भइरहेका छन् ।

० तपाइँहरूको काम गराईबाट जनताले स्थानीय सरकारको अनुभूति गरेका छन् ?

— डाक्नेश्वरी नगरपालिकाका जनताले स्थानीय सरकारको बहुत अनुभूति गरेका छन् । हामीले जनताको चाहना र अपेक्षाअनुसार योजनाहरू सञ्चालन गरिरहेका छौं । कुनै पनि योजना सञ्चालन गर्दा हामीले सबै पक्षसँग सल्लाह गर्ने गरेका छौं । लामो समयको अन्तरालपछि जनताको सबभन्दा नजिकको सरकार आउँदा अपेक्षा धेरै देखिन्छन् । तर, हामी विस्तारै ती अपेक्षाहरू पूरा गर्ने क्रममा छौं । हामीले संघीयतालाई संस्थागत गर्ने कार्यमा पनि जनतालाई सम्झाइरहेका छौं । नयाँ व्यवस्था भएकोले जनतालाई सोही बमोजिमको सुविधाहरू दिने भन्ने हाम्रो सोचाइ छ । युवाहरूको क्षमता अभिवृद्धिका लागि पनि हामीले धेरै योजनाहरू ल्याएका छौं । युवाहरूका लागि खेलकुददेखि विभिन्न किसिमका तालिमहरू पनि ल्याएका छौं ।

० मुलुकमा तीन तहको सरकार हुँदा पनि जनतामा व्यापक असन्तुष्टिहरू देखिएका छन् नि ? 

— मुलुक अहिले नयाँ संरचनामा जाँदा एकैचोटि सबै कुरा पूरा हुँदैन । विस्तारै जनताका चाहना र अपेक्षाहरू पूरा हुने हो । जनताका हरेक अपेक्षा एकैचोटि पूरा हुन अप्ठ्यारो नै छ । सबै कुरा एकैचोटि पूरा होस् भन्ने जनताको चाहना राम्रै हो तर, काम गर्दा समय लाग्छ नै । एउटा पार्टीको सरकार हुँदा अर्को पार्टीले आलोचना गर्नु नराम्रो होइन । ती आलोचनाहरूलाई हामीले सकारात्मक रूपमा लिँदै काम गर्दै आएका छौं । सकारात्मक कुराहरूलाई अंगीकार गर्ने नीति हाम्रो रहेको छ । तर, जनताले स्थानीय सरकारको अनुभूति गरेकै हुन्, नगरेको होइन ।

० ‘स्थानीय सरकारपछि सिंहदरबार गाउँ–गाउँमा’ भन्ने नारा जनताले महसुस गरेका छन् ?
— सिंहदरबार गाउँ–गाउँमा भन्ने कुरा सुन्दा हामीलाई पनि लागेको थियो कि जनताले सबैथोक गाउँमै पाउँछन् । यस्तो अपेक्षा हामीले पनि गरेका हौं । हामी काम गर्दै जाँदा कतै न कतै ऐन कानूनहरू बाँझ्दै गएको जस्तो लाग्छ । हामीलाई जनताको काम गर्न ऐन नियमले बाँधिदिएको छ कि भन्ने महसुस हुन्छ । सिंहदरबार गाउँ–गाउँमा त छ तर केही अप्ठ्याराहरू अहिले पनि छन् । खासगरी शिक्षाको क्षेत्रमा केन्द्रले पूर्णरूपमा जिम्मे अहिलेसम्म पनि स्थानीय सरकार हस्तान्तरण गर्न सकेको छैन । शिक्षा क्षेत्रको सम्पूर्ण अधिकार हामीलाई नदिँदा सुधार कसरी गर्ने भन्ने अहिलेसम्म पनि हामी अन्योलमै छौं । शिक्षाबाहेक लगभग अन्य अधिकारहरू हामीले पाएकै छौं ।

० भनेपछि पूर्णरूपमा सिंहदरबार गाउँ–गाउँमा आएको छैन ?

— केही क्षेत्रमा सिंहदरबारका सबै अधिकारहरू गाउँमा आएको छैन । अहिले सबै ऐन कानूनहरू बनिसकेको छैन । हामीले ऐन कानूनहरू बनाउँदैछौं । केन्द्रले कतिपय कानूनहरू अलि छिट्टै बनाइदिनुप¥यो । जस्तै, शिक्षा क्षेत्रकै कुरा गर्ने हो भने हामीले चाहेअनुसारको काम गर्न सकिरहेका छैनौं । शिक्षा क्षेत्रमा अलि स्पष्ट नभएकोले हामी गर्न पाइरहेका छैनौं । केन्द्रबाट हामीलाई तलब पठाइदिन्छ र हामीले वितरण गरिदिन्छौं । शिक्षामा योभन्दा बढी अधिकार हामीलाई दिइएको छैन । स्वास्थ्यमा पनि त्यस्तै अवस्था छ । हामीले एउटा राम्रो अस्पतालको अवधारणा पनि ल्याएका छौं ।

० तपाइँ आफ्नो कार्यभित्र डाक्नेश्वरी नगरपालिकालाई कस्तो बनाउने योजनामा हुनुहुन्छ ?

— ‘समृद्ध डाक्नेश्वरी नगरपालिका हामी सबैको चाहना’ भन्ने हाम्रो मूल नारा हो । यही नाराका साथ आफ्ना कार्य योजनाहरू अगाडि बढाउँदै आएका छौं । अहिलेसम्म हाम्रो नगरपालिकाको कार्यालयसमेत छैन । आफ्नो कार्यालय बनाउने सोचमा छौं । यहाँका बाटोघाटोको अवस्था राम्रो बनाउने लक्ष्यका साथ काम गरिरहेका छौं । त्यस क्षेत्रमा हामीले सफलता पनि प्राप्त गर्दै आएका छौं । स्वास्थ्य क्षेत्रमा पनि सुधारका लागि योजना अगाडि बढाउँदैछौं । यस नगरपालिकामा कमसेकम दुईटा बजार बनाऔं भन्ने योजनामा छौं । यो नगरपालिकालाई समृद्ध बनाउनका लागि हामीले दीर्घकालीन तथा अल्पकालीन योजनाहरू पनि ल्याएका छौं । तसर्थ, यहाँका जनताले सिंहदरबार गाउँ–गाउँमा महसुस गर्ने प्रयासमा लागेका छौं । सबै सेवा सुविधाहरू आफ्नो ठाउँमा पाओस् भन्ने हाम्रो चाहना हो ।

तपाईको प्रतिक्रिया