जनकपुरधाम, १८ माघ । प्रदेश नं. २ सरकारले स्थापना गरेको मधेश स्वास्थ्य विज्ञान प्रतिष्ठानमा पदाधिकारीहरु नियुक्त भएका छन् ।
मधेश स्वास्थ्य विज्ञान प्रतिष्ठानका उपकुलपतिमा डा. राम केवल साह, रजिष्ट्रारमा डा. विनोद यादव र रेक्टरमा डा. अंकुर साहलाई नियुक्त गरिएको छ ।
मुख्यमन्त्री निवास मधेश भवनमा आयोजित एक कार्यक्रमका बीच मुख्यमन्त्री मो.लालबाबु राउत गद्दीले नवनियुक्त पदाधिकारीहरुलाई नियुक्ति पत्र हस्तान्तरण गरेका छन् ।
नियुक्ति पत्र हस्तान्तरणपछि संचारकर्मीहरुलाई सम्बोधन गर्दै मुख्यमन्त्री राउतले प्रदेशकै गौरवको योजनाको रुपमा रहेको प्रतिष्ठानको पदाधिकारी नियुक्ति सरकारका लागि गौरवका दिनको रुपमा रहेको बताए ।
नवनियुक्त पदाकिारीहरुका लागि अवसर र चुनौती दुबै रहेको उल्लेख गर्दै मुख्यमन्त्री राउतले यसै वर्षदेखि एकेडेमिक सेशनहरु संचालन हुने विश्वास व्यक्त गरे ।
प्रादेशिक अस्पताल जनकपुरलाई आधार मानेर प्रदेश सरकारले मधेश स्वास्थ्य विज्ञान प्रतिष्ठानको स्थापना गरेको हो ।
कार्यक्रममा समाजिक विकास मन्त्री नवलकिशोर साह, भूमि व्यवस्था तथा कृषि सहकारीमन्त्री शैलेन्द्र प्रसाद साह, मुख्यन्यायाधिवक्ता दिपेन्द्र झा सहितको उपस्थिति रहेको थियो ।
तपाईको प्रतिक्रिया