जनकपुरधाम, १४ साउन । पूर्वउपप्रधानमन्त्री तथा जनता समाजवादी पार्टी नेपालका वरिष्ठ नेता राजेन्द्र महतोलाई जनकपुरधाममा भव्य स्वागत भएको छ ।

बिहीबार आफ्नो निर्वाचन क्षेत्र पुगेका महतोलाई भव्य स्वागत भएको हो । उनले निर्वाचन आयोगले जसपा फुटाइदिएको आरोप लगाएका छन् । उनले आफूहरु कुनै नयाँ पार्टी दर्ता नगर्ने बताउँदै पहिलाकै पूर्वराजपा ब्युताउने संकेत गरेका हुन् ।

उनले सञ्चारकर्मीहरुलाई प्रतिक्रिया दिँदै उपेन्द्र यादवले १८ महिनामा गर्न नसकेको काम आफूहरुले १८ दिनमा गरेको जिकिर गरेका छन् ।

आफूहरु ओली सरकारमा उधारोमा नभई नगदमा अथवा आफ्ना केही मागहरु पूरा गराएर गएको दाबी गरेका छन् ।

महतोले १८ दिनभित्रै नागरिकता अध्यादेश ल्याएको, १४० जना उपर रहेको मुद्दा फिर्ता गराएको, संविधान संशोधनका लागि कार्यदल बनाएको बताउँदै नागरिकता अध्यादेश ल्याए पनि अदालत बेइमान भएपछि कार्यान्वयन नभएको बताए ।

उपेन्द्र यादव १८ महिना सरकारमा रहँदा यी कामहरु गर्न नसकेको टिप्पणी गर्दै भने, ‘उपेन्द्रजीले चार पटक प्रयास गरे पनि गर्न नसकेको काम हामीले एकै पटकमा गरेका छौं ।’