महोत्तरी, १७ भाद्र । महोत्तरीको मूल भन्सार भिट्ठामोड सीमानाका करिब १७ महिनापछि पुनः सञ्चालनमा आएको छ ।

महोत्तरीको जलेश्वरस्थित मूल भन्सार भिट्ठामोड सीमा नाकाको मुख्य बाटोबाटै सञ्चालनमा आएको हो ।

कोरोना महामारीका कारण २०७६ चैत ११ गतेदेखि बन्द रहेको नाका बन्द गरिएको थियो । जसका कारण सर्वसाधारणहरू छेउछाउबाट आवतजावत गर्ने गर्दै आएका थिए ।

जलेश्वर नगरपालिकाको सीमासँगै जोडिएको वडा नम्बर ३ मलिवाराका वडाध्यक्ष सञ्जय पाण्डेको नेतृत्वमा करिब १०० जनाले सीमा नाकामा धर्ना बसेपछि सर्वसाधारणको आवतजावत खुला गरिएको हो ।

नाकाबाट मालवाहक ट्रक, टिपरलगायत साधन लकडाउनका बेला पनि निर्बाध आवतजावत हुने गरेको भए पनि सर्वसाधारणलाई रोक लगाइएको थियो ।

भन्सार भएरै पैदल यात्रुलाई आवतजावत गर्न नदिएपछि उनीहरू ५०० मिटर टाढा खोल्सीको बाटो हुँदै नेपाल–भारत आउजाउ गर्दै आएका थिए ।

नाकाबाट पैदल आवागमन शुरू भए पनि सार्वजनिक तथा निजी सवारी साधन अझै सञ्चालन भएको छैन ।

मालवाहक गाडीहरू पहिले झैँ आउजाउ गरिरहेको जलेश्वर भन्सार कार्यालयले जनाएको छ । अहिले पनि औपचारिक रुपमा नेपाल भारतको सीमा नाका बन्द नै रहेको छ ।