जनकपुरधाम, १४ भाद्र । मधेश विद्रोहका मुद्दाहरुलाई सही दिशामा अग्रसर गर्दै संस्थागत गर्ने उद्देश्यका साथ ‘लोकतान्त्रिक मधेशी फ्रन्ट’ घोषणा भएको छ ।
मधेशकेन्द्रित दलहरु तराई–मधेश लोकतान्त्रिक पार्टी र नेपाल सद्भावना पार्टीले संयुक्तरुपमा मंगलबार जनकपुरधाममा एक कार्यक्रमको आयोजना गरी लोकतान्त्रिक मधेशी फ्रन्टको घोषणा गरेका छन् ।
मधेश विद्रोहका मुद्दाहरुलाई संस्थागत गर्न तथा विकासको पारदर्शी स्पष्ट रणनीतिका साथ मधेश र देशलाई संघीयताको अभ्यासमा अघि बढाउन तमलोपा र नेसपाबीच सहकार्यको सहमति भएको हो ।
लोकतान्त्रिक मधेशी फ्रन्टको नीति तथा कार्यक्रम तयार गर्न, आवश्यक निर्णय र सञ्चालन गर्न ६ सदस्यीय परिचालन समितिसमेत गठन गरिएको छ ।
लोकतान्त्रिक मधेशी फ्रन्ट परिचालन समितिमा तमलोपाका वरिष्ठ नेता डा.विजयकुमार सिंह, नेसपाका वरिष्ठ नेता प्रो.राजेन्द्र प्रसाद सिंह कुशवाहा, नेसपाका सहमहासचिव डा.रविन्द्र कुमार चौधरी, तमलोपाका रविशंकर कुमार कर्ण, विभा ठाकुर र नेसपाका प्रो.बालकेश्वर ठाकुर रहेका छन् ।
तमलोपाका अध्यक्ष वृषेशचन्द्र लाल र नेसपाका अध्यक्ष रामकुमार महतोले संयुक्तरुपमा जारी गरेको वित्रप्तिमा भनिएको छ, ‘लोकतान्त्रिक मधेशी फ्रन्ट मधेश आन्दोलनका मुद्दाहरुप्रति प्रतिबद्ध सबै लोकतान्त्रिक शक्तिहरुलाई यस एकजुटता अभियानमा सहभागिताका लागि आह्वान गर्दछ ।’
तपाईको प्रतिक्रिया