जनकपुरधाम, १६ जेठ । संकटमोचन देवशरण रामरति माध्यमिक विद्यालयका शिक्षकमाथि भएको कुटपिटको घटनालाई लिएर सो विद्यालयको पठन पाठन अनिश्चितकालका लागि बन्द गरिएको छ ।

सो विद्यालयको निम्न माध्यमिक तहको कम्प्युटर शिक्षक अखिलेश झालाई एक समूहले योजनाबद्ध रुपमा विद्यालयमा प्रवेश गरेर कुटपिट गरेकोमा दोषीहरूलाई पक्राउ गरेर कारबाही नगरेसम्म विद्यालयको पठन पाठन ठप्प रहने विद्यालयले जनाएको छ ।

विद्यालयका शिक्षक तथा व्यवस्थापन समितिको बसेको बैठकबाट दोषीलाई पक्राउ गरेर कारबाही नगरेसम्म विद्यालयको पठन पाठन ठप्प रहने जनाएको छ ।

जनकपुरधाममा भएको सामुदायिक विद्यालयहरू मध्ये सबैभन्दा बढी विद्यार्थीहरू भएको सो विद्यालयमा आइतबार घटेको घटनाको विरोधमा शिक्षकहरूले प्रहरीमा लिखित रुपमा कारबाहीका लागि उजुरी पनि दिएको छ ।

यसैबीच नेपाल शिक्षक संघ नगर समितिले शिक्षक माथि हातपात गर्ने दोषी माथि कारबाही नभएको खण्डमा नगर भरिका विद्यालयका शिक्षकहरू विद्यालय बन्द गरेर आन्दोलनमा उत्रने जनाएको छ ।