नेपालगञ्ज, २७ जेठ । बढ्दै गएको अत्यधिक गर्मीका कारण बाँकेको कोहलपुर नगरपालिकाले जेठ २८ गतेदेखि ३० गतेसम्म तीन दिन गर्मी बिदा थप गरेको छ ।
अत्याधुनिक गर्मी बढेपछि पहिलोपटक ३ दिन र थप २ दिन गरी जम्मा ५ दिन गर्मी बिदा गरेको कोहलपुर नगरपालिकाले पुनः ३ दिन गर्मी बिदा थप गरेको हो ।
अत्यधिक गर्मीले साना(साना बालबालिका बढी प्रभावित भएको भन्दै नगरपालिकाले जेठ २२ ,२३ र २४ गरी ३ दिन विद्यालयहरू बन्द गर्ने निर्णय गरेको थियो भने पुनः २५ र २६ गते बिदा थप गरेको थियो ।
अझै पनि मौसममा सुधार नआएको भन्दै नगरपालिकाले जेठ २८,२९ र ३० गते गरी ३ दिन गर्मी बिदा थप गरेको कोहलपुर नगर शिक्षा शाखाले जनाएको छ ।
बाँके जिल्लामा एक सातायता अधिकतम तापक्रम ४० डिग्री भन्दा माथि पुगेको छ ।
भौतिक संरचना राम्रो नभएका कतिपय विद्यालयमा विद्यार्थीहरू बिरामी हुने, बेहोस हुने जस्तो अवस्था देखिएपछि कोहलपुर लगायत बाँके जिल्लाका अधिकांश स्थानीय तहले विद्यालय बन्द गरेका छन् ।
तपाईको प्रतिक्रिया