राकेश यादव, रौतहट । विभिन्न पार्टी परित्याग गरी दर्जनौ नेता कार्यकर्ता जनता समाजवादी पार्टी नेपालमा प्रवेश गरेका छन् ।
जनता समाजवादी पार्टी नेपाल रौतहट जिल्ला कार्य समितिले सोमबार गरुडा नगरपालिका–५ महम्मदपुरस्थित रहेको गोपाल सेवा समिति धर्मशालामा आयोजना गरेको विस्तारित बैठक एवं पार्टी प्रवेश कार्यक्रममा नेकपा एमाले, नेकपा एकीकृत समावादी, नेकपा माओवादी लगाएत दलबाट दर्जनौको संख्यामा नेता कार्यकर्ताहरु जसपा नेपालमा प्रवेश गरेका हुन् ।
विगतमा जसपा नेपाल छाडेर अन्य पार्टीमा गएकाहरु पुनः पार्टीमा फर्किएका छन् । केही कारणले गर्दा पार्टीबाट असन्तुष्ट भइ अन्य पार्टीमा गएका उनीहरु फेरि आफ्नै पुरानो घर जसपा नेपालमा फर्केका हुन् ।
कार्यक्रममा माधवनारायण नगरपालिका–२ खेसरहियाका पूर्ववडा अध्यक्ष हनुमान सहनी, माधवनारायण नगरपालिका–६ माधोपुरका वडा अध्यक्षका प्रत्यासी हरिनारायण प्रसाद यादव, नेता चन्देश्वर साह तेली, दुर्गा भगवती गाउँपालिका–२ भलोहियाका वडा अध्यक्षका प्रत्यासी रमेश महतो, माधवनारायण नगरपालिका–३ भेल्हीका रामइश्वर यादव सहितका नेता कार्यकर्ताहरु जनता समाजवादी पार्टी नेपालमा प्रवेश गरेका छन् ।
केन्द्रीय उपाध्यक्ष गोविन्द चौधरीले टिका र माला लगाएर उनीहरुलाई पार्टीमा स्वागत गरेका हुन् । उपाध्यक्ष चौधरीको हातबाट टिका माला लगाएर राजनीतिमा राम्रो पकड र जनमत भएका नेता कार्यकर्ताहरु जसपा नेपालमा प्रवेश गरेको पार्टीका जिल्ला अध्यक्ष श्याम विहारी यादवले जानकारी दिए ।
पार्टी छाडेर गएका नेता कार्यकर्ताहरु पुनः आफना पुरानै घरमा आएपछि रौतहटमा जनता समाजवादी पार्टी नेपाल अझै बलियो र मजबुत भएको पार्टीका जिल्ला अध्यक्ष यादवले बताए ।
पार्टीको केन्द्रीय समितिको निर्णय अनुसार चार महिने जनतासँग जनता समाजवादी पार्टी नेपाल आधारभूत संगठन निर्माण अभियानअन्तर्गत आफूहरुले विभिन्न नेता कार्यकर्ताहरुलाई पार्टी प्रवेश गराएर संगठन निर्माण र पार्टीलाई बलियो बनाउने अभियानमा लागेको अध्यक्ष यादवको भनाइ रहेको छ ।
कार्यक्रममा बोल्दै जनता समाजवादी पार्टी नेपालका उपाध्यक्ष गोविन्द चौधरीले मिसन २०८४ लाई ध्यानमा राख्दै पार्टीलाई अझै मजबुत र बलियो बनाउने कार्यमा अहिलेदेखि नै लाग्न सम्पूर्ण नेता कार्यकर्ताहरुलाई आग्रह गरेका छन् ।
पार्टी प्रवेश कार्यक्रममा जसपा नेपालका केन्द्रिय सदस्य एवं मधेश प्रदेशका पूर्व कृषि राज्य मन्त्री योगेन्द्र यादवले मधेश र मधेशी जनताको अधिकार तथा पहिचान दिलाउने एक मात्र पार्टी जसपा नेपाल मात्र रहेको बताउँदै जसपा नेपालमा सबैजनालाई लाग्न आग्रह गरेका हुन् ।
ठुला ठुला दलहरु मधेशी जनताको भोट मात्र ठग्ने गरेको र अधिकार दिन नचाहेकोले आउँदो निर्वाचनमा मधेशी विरोधी पार्टीहरुलाई पराजित गर्नुपर्ने धारणा नेता यादवले जोड दिए ।
कार्यक्रममा पार्टीका केन्द्रीय कार्यकारीणी समिति सदस्य किशोरी यादव, विश्वनाथ पटेल, मधेश प्रदेशकी रास्ट्रिय सभा सदस्य पुजा चौधरी, प्रदेश सांसद सोभा देवी साह, पार्टीका मधेश प्रदेश अध्यक्ष बालकिशोर यादव, केन्द्रीय सदस्य एवं मधेश प्रदेशका पूर्व खानेपानी राज्य मन्त्री अब्बुल कलाम आजाद भन्ने शेख फुलबाबु, केन्द्रीय सदस्य किरण ठाकुर लगाएतका नेताहरु आ–आफना धारणा राख्दै पार्टी संगठनलाई मजबुत बनाउने बिषयमा जोड दिएका थिए ।
तपाईको प्रतिक्रिया