काठमाडौं । लोकतान्त्रिक विद्यार्थी संघका केन्द्रीय अध्यक्ष रोशन कुमार मिश्रले पदबाट राजीनामा दिएका छन् । उनले पार्टीका संरक्षकलाई सम्बोधन गर्दै बुधबार राजीनामा पत्र बुझाएका हुन् ।
मिश्रले आफूले करिब डेढ दशक विद्यार्थी राजनीतिमा सक्रिय रहेर विभिन्न जिम्मेवारी सम्हाल्दै आएको उल्लेख गरेका छन् । तत्कालीन तराई–मधेश विद्यार्थी फ्रन्टको साधारण सदस्यबाट राजनीतिक यात्रा सुरु गरेका उनले क्याम्पस कमिटी अध्यक्ष, काठमाडौं उपत्यका कमिटीको कार्यवाहक अध्यक्ष, केन्द्रीय सदस्य र केन्द्रीय महासचिव हुँदै पछिल्लो चार वर्षदेखि लोकतान्त्रिक विद्यार्थी संघको केन्द्रीय अध्यक्षको जिम्मेवारी सम्हालेको बताएका छन् ।
राजीनामा पत्रमा उनले अब केन्द्रीय अध्यक्ष पद तथा आफूले सम्हालेका सम्पूर्ण संगठनात्मक जिम्मेवारीबाट अलग हुने निर्णय गरेको उल्लेख गरेका छन् ।
मिश्रले विद्यार्थी राजनीतिमा सक्रिय रहँदा मधेश आन्दोलन तथा मधेशको अधिकार र पहिचानको संघर्षमा सहभागी हुने अवसर पाएको बताएका छन् । संगठनका विभिन्न जिम्मेवारी सम्हाल्ने क्रममा आफूले धेरै अनुभव र सिकाइ हासिल गरेको उनको भनाइ छ ।
उनले अध्यक्षको जिम्मेवारीमा रहँदा विद्यार्थीका हकहित र अधिकारका सवाल उठाउने, संगठनलाई व्यवस्थित बनाउने तथा विद्यार्थी साथीहरूसँग निरन्तर सम्पर्कमा रहने प्रयास गरेको उल्लेख गरेका छन् । साथै सहयोग गर्ने अग्रज, सहकर्मी तथा सम्पूर्ण विद्यार्थीप्रति उनले आभार व्यक्त गरेका छन् ।
राजीनामा पत्रमा मिश्रले आगामी दिनमा ‘हुंकार मधेश’ नामक अभियानमार्फत अघि बढ्ने निर्णयमा पुगेको समेत उल्लेख गरेका छन् । उनले उक्त निर्णय कुनै आवेग वा भावनामा नभई सचेत रूपमा लिएको बताएका छन् ।
आगामी दिनमा युवा, समाज र मधेशसँग जोडिएका सवालमा स्वतन्त्र रूपमा काम गर्ने आफ्नो सोच रहेको मिश्रले बताएका छन् ।
सार्वजनिक स्रोतहरूमा पनि रोशन मिश्रलाई लोकतान्त्रिक विद्यार्थी संघका केन्द्रीय अध्यक्षका रूपमा उल्लेख गरिएको पाइन्छ ।
तपाईको प्रतिक्रिया