सर्लाही । अग्रगामी मोर्चाले संगठनलाई गाउँ–गाउँ र वडा–वडासम्म विस्तार गर्दै आगामी राजनीतिक संघर्षलाई सशक्त बनाउने निर्णय गरेको छ। सर्लाही जिल्ला समन्वय कमिटीको बैठकले संगठन विस्तारसँगै आगामी राजनीतिक गतिविधिलाई प्रभावकारी बनाउने रणनीति तय गरेको हो।
मलङ्गवास्थित होटल दरबार इनमा जनता समाजवादी पार्टी (जसपा) नेपालका सर्लाही जिल्ला अध्यक्ष रन्धिर कुमार यादवको अध्यक्षतामा बसेको बैठकमा मोर्चामा आबद्ध नौ राजनीतिक दलका जिल्ला अध्यक्ष तथा प्रतिनिधिहरू सहभागी थिए। बैठकमा पूर्वगृह राज्यमन्त्री तथा नेपाल संघीय समाजवादी पार्टीका अध्यक्ष मोहम्मद रिजवान अन्सारी प्रमुख अतिथिका रूपमा सहभागी भएका थिए।
बैठकले आगामी भदौ २७ गते मधेश प्रदेशको राजधानी जनकपुरधाममा हुने अग्रगामी मोर्चाको प्रदेशस्तरीय नेता तथा कार्यकर्ता अभिमुखीकरण एवं प्रदेश मोर्चा घोषणा कार्यक्रमलाई भव्य रूपमा सफल बनाउने निर्णय गरेको छ। त्यसका लागि सर्लाहीबाट ठूलो संख्यामा नेता, कार्यकर्ता तथा समर्थक सहभागी गराउने निर्णय गरिएको छ।
बैठकलाई सम्बोधन गर्दै अध्यक्ष अन्सारीले प्राप्त लोकतान्त्रिक उपलब्धिको रक्षा गर्दै बाँकी अधिकार प्राप्तिका लागि संगठित राजनीतिक संघर्ष आवश्यक रहेको बताए।
संघीयता समाप्त गर्ने, गणतन्त्र, धर्मनिरपेक्षता, संविधान तथा समावेशितामाथि आक्रमण गर्ने कुनै पनि प्रयास स्वीकार्य नहुने भन्दै उनले त्यस्तो अवस्था आए अग्रगामी मोर्चा प्रतिरोधको अग्रपंक्तिमा उभिने दाबी गरे।
मोर्चा तत्कालीन सत्ता समीकरण वा कुनै व्यक्ति तथा पदको स्वार्थबाट गठन नभएको उनको भनाइ थियो। जनताको अधिकार, समानता, सामाजिक न्याय र सुशासनका लागि दीर्घकालीन राजनीतिक संघर्ष गर्ने साझा मञ्चका रूपमा मोर्चालाई अघि बढाइने उनले बताए।
“यो मोर्चा विगतका मोर्चाजस्तो बन्ने र फेरि भत्किने होइन। यो कुनै व्यक्ति, पद वा तत्कालीन सत्ता स्वार्थका लागि बनेको मोर्चा होइन,” अन्सारीले भने, “उत्पीडित जनताको अधिकार र राज्यसत्तामा सार्थक सहभागिता सुनिश्चित गर्ने लक्ष्यसम्म हाम्रो एकता र संघर्ष कायम रहन्छ।”
अन्सारीले आगामी दिनमा मोर्चामा आबद्ध दलहरूबीचको एकतालाई थप सुदृढ गर्दै एउटै चुनाव चिन्हबाट निर्वाचनमा सहभागी हुने दिशामा अघि बढ्ने बताए।
उनका अनुसार अग्रगामी मोर्चा निर्वाचनका बेला मात्र सक्रिय हुने गठबन्धन नभई सडक संघर्षदेखि निर्वाचन र सरकारसम्म जनताको पक्षमा संयुक्त रूपमा काम गर्ने राजनीतिक शक्तिका रूपमा स्थापित गरिनेछ।
“हामी सडकमा पनि जनताको अधिकारका लागि सँगै संघर्ष गर्छौं, चुनावमा पनि एउटै चुनाव चिन्ह लिएर जनताको बीचमा जान्छौं र सरकारमा जाने अवस्था आएमा पनि जनताको पक्षमा काम गर्न एकताबद्ध भएर सहभागी हुन्छौं,” उनले भने।
राष्ट्रिय स्वाधीनता, दिगो शान्ति, सुशासन तथा समृद्ध नेपाल निर्माणका लागि अग्रगामी राजनीतिक शक्तिहरूबीच एकता आवश्यक रहेको उनले बताए।
बैठकले सर्लाहीमा मोर्चाको संगठनलाई तल्लो तहसम्म विस्तार गर्ने निर्णय गरेको छ। त्यसअनुसार संसदीय निर्वाचन क्षेत्र, प्रदेशसभा निर्वाचन क्षेत्र, नगरपालिका, गाउँपालिका तथा वडा तहसम्म संगठन निर्माण र विस्तार गरिनेछ।
त्यसैगरी बुद्धिजीवी, युवा, विद्यार्थी, किसान तथा महिलालगायत विभिन्न समुदाय र क्षेत्रलाई संगठित गर्न भ्रातृ तथा जनसंगठन निर्माण गर्ने निर्णयसमेत गरिएको छ।
अन्सारीले मोर्चामा आबद्ध सबै दलका नेता तथा कार्यकर्तालाई संगठनलाई वडा तहसम्म पुर्याउन सक्रिय रूपमा परिचालित हुन निर्देशन दिए।
अन्सारीले लामो समयदेखि राजनीतिक, सामाजिक तथा आर्थिक रूपमा उत्पीडनमा परेका समुदायलाई अग्रगामी मोर्चाप्रति विश्वास गर्न आग्रह गरे।
मोर्चा सरकारमा सहभागी हुने अवसर खोज्ने मात्र नभई राज्यको चरित्र परिवर्तन, विभेदको अन्त्य तथा उत्पीडित जनताको अधिकार स्थापित गर्ने दीर्घकालीन अभियान भएको उनको दाबी थियो।
“उत्पीडित जनताले ढुक्क भए हुन्छ—यो मोर्चा टुटफुट हुँदैन। यो मोर्चा सरकारमा सहभागी हुन मात्रै गठन गरिएको होइन,” उनले भने, “नेपाली उत्पीडित जनताको राज्यसत्तामा सार्थक सहभागिता स्थापित नभएसम्म र जातीय तथा साम्प्रदायिक विभेदमा आधारित शासन व्यवस्थाको अन्त्य नभएसम्म यो संघर्ष जारी रहन्छ।”
बैठकले भदौ २७ गते जनकपुरधाममा आयोजना हुने प्रदेशस्तरीय अभिमुखीकरण तथा मोर्चा घोषणा कार्यक्रमलाई व्यापक जनसहभागितासहित सफल बनाउन सर्लाहीसहित मधेश प्रदेशका विभिन्न जिल्लामा अभियान सञ्चालन गर्ने निर्णय गरेको छ।
अन्सारीले न्याय, समानता, स्वतन्त्रता, सामाजिक न्याय, जनअधिकार तथा राष्ट्रिय स्वाधीनताको पक्षमा रहेका परिवर्तनकामी नागरिकलाई कार्यक्रममा सहभागी हुन आह्वान गरे।
अग्रगामी मोर्चाले संघीय लोकतान्त्रिक गणतन्त्र, धर्मनिरपेक्षता, समावेशिता, सामाजिक न्याय, सुशासन, राष्ट्रिय स्वाधीनता तथा जनअधिकारको संरक्षण र विस्तारलाई आफ्नो राजनीतिक अभियानको प्रमुख आधार बनाउने जनाएको छ। साथै संगठनलाई क्रमशः देशव्यापी रूपमा विस्तार गर्ने तयारी गरेको छ।
तपाईको प्रतिक्रिया