काठमाडौं, २१ भाद्र । चिकित्सा शिक्षा आयोगको उपाध्यक्षमा नेपाल सरकारले प्राध्यापक डा. अञ्जनीकुमार झालाई नियुक्त गरेको छ ।
बिहीबार बसेको मन्त्रिपरिषद् बैठ्कले प्रा.डा.झालाई नियुक्ति गरेको हो । लोकसेवा आयोगका अध्यक्षको अध्यक्षतामा गठित समितिले ३ जनाको नाम सिफारिस गरेको थियो । तीमध्ये झा नियुक्त भएका हुन् ।
उनीसहित श्रीकृष्ण गिरी, प्रवीण मिश्रको नाम सिफारिसमा परेको थियो । झा कांग्रेस निकट नेपाल चिकित्सक संघका पूर्वअध्यक्ष हुन् ।
उपाध्यक्ष बन्न मान्यता प्राप्त विश्वविद्यालयबाट चिकित्साशास्त्रमा कम्तीमा स्नातकोत्तर उपाधि प्राप्त गरी कम्तीमा २० वर्षको अनुभव भएको वा १० वर्षको अनुभवसहित स्वास्थ्य सेवामा क्षेत्रमा कम्तीमा २० वर्ष काम गरेको अनुभव हुनुपर्ने व्यवस्था छ ।
२०७५ मा जारी चिकित्सा शिक्षा ऐन र चिकित्सा शिक्षा आयोगसँग स्वार्थको टकराव नभएको हुनुपर्ने योग्यता तोकिएको छ ।
सिफारिस समितिले व्यावसायिक कार्ययोजना सहितको सोचपत्रसमेत दरखास्तको साथ माग गरेको थियो । दरखास्तको आधारमा प्रारम्भिक छनौट गर्ने र प्रस्तुति पछि ३ जनाको नाम सिफारिस गर्न सक्ने व्यवस्था छ ।
सिफारिसको आधारमा प्रधानमन्त्री तथा आयोग अध्यक्षले एक जनालाई उपाध्यक्षमा नियुक्ति गर्नेछन् ।
तपाईको प्रतिक्रिया