म नेतृत्व खोज्दै हिँडेको होइन। न म कुनै राजनीतिक दलमा आबद्ध छु, न मलाई सत्तासँग जोडिएको शक्ति छ। म केवल एउटा चिकित्सक हुँ — जसको सबैभन्दा ठूलो लक्ष्य हो: देशको दुर्गम समुदायलाई सेवा दिनु।

म जनकपुरको कठपुल्ला हसपुर गाउँमा जन्मिएको हुँ — जहाँ स्वास्थ्य सेवा पुग्नै गाह्रो थियो। त्यहीँको पीडाबाट प्रेरित भएर मैले चिकित्सा पढ्ने निर्णय लिएँ। किंग  एडवार्ड  मेडिकल  कलेज , लाहोर, पाकिस्तानबाट MBBS पास गरेँ। पछि MD Pediatrics पनि त्यहींबाट पूरा गरेँ।

तर मैले सधैं विश्वास गरेँ — केवल डिग्रीले परिवर्तन सम्भव हुँदैन। त्यसैले मैले अझ गहिरो ज्ञानका लागि Japan (Nihon University), Hungary (EASD Clinical Course), USA (PGPN by Boston University) जस्ता प्रतिष्ठित संस्थाबाट तालिम लिने अवसर लिएँ।

पछिल्ला १० वर्षदेखि म BPKIHS, धरानमा सह–प्राध्यापकको रूपमा कार्यरत छु। मैले सयौं विद्यार्थीहरू तयार पारेको छु, हजारौं बालबालिकाको उपचारमा संलग्न भएको छु। खासगरी बाल मधुमेह, थाइराइड र किशोर हर्मोन विकारका क्षेत्रमा काम गरेको छु।

तर आज पनि नेपालका केही भूगोलहरूमा यो सुविधा केवल सपना हो।

किन कर्णाली?

म धेरैपटक आफैंसँग प्रश्न गर्छु— किन अझै पनि कर्णालीका आमाहरूले सुरक्षित प्रसूति पाउँदैनन्? किन बच्चाहरू पोषणको अभावमा हुर्किन्छन्?

त्यही अवस्थालाई बदल्ने सोचले म कर्णाली स्वास्थ्य विज्ञान प्रतिष्ठान (KAHS), जुम्लाको उपकुलपति पदमा उम्मेदवारी दिएको छु।

म यो पदलाई "पद"को रूपमा होइन, एउटा "अवसर"को रूपमा लिएको छु — जसबाट म आफ्नो ज्ञान, सीप र अनुभवलाई प्रत्यक्ष रूपमा कर्णालीका जनताको सेवामा प्रयोग गर्न सक्छु।

म राजनीतिक पहुँचविहीन व्यक्ति हुँ। मलाई शक्ति छैन। तर मलाई विश्वास छ — जनताको समर्थन, विद्यार्थीहरूको साथ, र आफ्नो निष्ठाले परिवर्तन सम्भव छ।

कस्तो परिवर्तन ल्याउने?

म कर्णालीमा सेवा, शिक्षा र अनुसन्धानको सन्तुलन ल्याउन चाहन्छु। मेरो योजना यस्ता छन्:

१. शिक्षा पहुँचमा – स्थानीय विद्यार्थीलाई प्राथमिकता दिइनेछ। स्थानीय भाषामा सामग्री विकास गरिनेछ।

२. टेलिमेडिसिन सेवा – दुर्गम गाउँमा विशेषज्ञ सेवा पुगोस् भनेर मोबाइल स्वास्थ्य सेवा, भर्चुअल क्लिनिक विस्तार गरिनेछ।

३. अनुसन्धान केन्द्र – स्थानीय रोगहरू, पोषण समस्या र बाल–किशोर स्वास्थ्यमा आधारित अनुसन्धान गरिनेछ।

४. समुदायमा शिक्षक– चिकित्सकहरूलाई सामुदायिक शिक्षक बनाइनेछ, ताकि स्वास्थ्य शिक्षाले जनतालाई सशक्त बनाओस्।

५. कर्णालीमै उपस्थित रहने नेतृत्व– उपकुलपति कार्यालय जुम्लामै रहनेछ। जनतासँग प्रत्यक्ष संवाद, कर्मचारीसँग नियमित समन्वय गरिनेछ।

 किन म?

म सधैं विद्यार्थी रहन चाहन्छु। सधैं सुनिरहन चाहन्छु। नेतृत्वमा रहँदा निर्णय गर्नुपर्छ — तर त्यो निर्णय कुर्सीमा बसेर होइन, गाउँमा बसेर गर्नुपर्छ भन्ने मेरो विश्वास छ।

देशले अहिले इमानदार नेतृत्व खोजिरहेको छ। कुनै "सेलिब्रिटी" होइन, काम गर्ने व्यक्तित्व चाहिएको छ।

म सधैं काममा विश्वास गर्छु। मलाई प्रचार चाहिंदैन। मलाई परिवर्तन चाहिन्छ।

कर्णालीका बिरामीहरूको आँखाबाट टल्किने भरोसा नै मेरो सम्मान हो।

मेरो प्रतिवद्धता

म निम्न कुरामा प्रतिबद्ध छु:

- कर्णालीको भौगोलिक र सामाजिक बाधालाई शिक्षा र स्वास्थ्यमार्फत तोड्नेछु।

- विद्यार्थी, शिक्षक र कर्मचारीबीच पारदर्शिता र जवाफदेहिताको वातावरण बनाउनेछु।

- प्रतिष्ठानमा राजनीति होइन, दक्षता र सेवाभाव प्रधान हुने नीति बनाउनेछु।

- जनतासँग प्रत्यक्ष संवाद गर्दै समुदाय–केन्द्रित नीति कार्यान्वयन गरिनेछ।

- अन्तर्राष्ट्रिय साझेदारी र स्रोत व्यवस्थापन गरेर कर्णालीलाई उत्कृष्टता केन्द्र बनाउने प्रयास गरिनेछ।

निष्कर्ष

म राजनीतिमा छैन। तर म राजनीतिज्ञहरूभन्दा बढी देशको सेवामा छु।

म सत्ताको कुर्सी खोज्दिनँ, सेवा गर्ने कुर्सी खोजिरहेको छु।

यदि म उपकुलपति बन्ने अवसर पाएँ भने, त्यो मेरो लागि उपलब्धि होइन — त्यो "अवसर" हुनेछ, जसबाट म कर्णालीको बच्चालाई स्वास्थ्य, युवालाई शिक्षा, आमालाई सुरक्षा, र समाजलाई आशा दिन सक्छु।

यस पवित्र यात्रामा म तपाईंहरूको साथ र विश्वासको अपेक्षा राख्दछु।